Breyting á ýmsum lögum vegna fjárlaga 2023
2. mál á 153. löggjafarþingi.
Fjármála- og efnahagsráðherra.
Markmið
Að breyta ýmsum lögum sem tengjast tekju- eða gjaldahlið ríkissjóðs í samræmi við forsendur fjárlagafrumvarps fyrir árið 2023.Helstu breytingar og nýjungar
Lagt er til að krónutöluskattar (kolefnisgjald, olíugjald, almennt og sérstakt kílómetragjald, almennt og sérstakt bensíngjald, bifreiðagjald og gjald á áfengi og tóbak) hækki um 7,7%. Sama gildir um gjald í Framkvæmdasjóð aldraðra, sérstakt gjald til Ríkisútvarpsins og gjöld sem kveðið er á um í lögum um aukatekjur ríkissjóðs. Þá er lagt til að dregið verði úr afslætti áfengisgjalds og tóbaksgjalds sem lagt er á í tollfrjálsum verslunum. Gert er ráð fyrir að sérstakt 5% vörugjald verði lagt á öll ný ökutæki með skráða losun koltvísýrings sem ekki eru sérstaklega tilgreind í tiltekna undirflokka. Þá er lagt til að sérstakt 5% vörugjald skuli lagt á allar nýjar fólksbifreiðar sem knúnar eru vetni eða rafhreyfli að öllu leyti. Þá er stefnt að tvöföldun á lágmarksfjárhæð bifreiðagjalds. Gera á breytingar á eftirlitsgjaldi til að standa undir áætluðum kostnaði við rekstur Fjármálaeftirlits og skilavalds innan Seðlabanka Íslands. Flestar aðrar breytingar tengjast framlengingu bráðabirgðaákvæða.Breytingar á lögum og tengd mál
Alls er verið að breyta 24 lögum.- Skylt mál: Fjárlög 2023, 1. mál (fjármála- og efnahagsráðherra) á 153. þingi (13.09.2022)
Kostnaður og tekjur
Gjöld
Tillaga í frumvarpinu um óbreyttar viðmiðanir vaxtabótakerfisins leiðir til þess að útgjöld vegna vaxtabóta nema 1,9 milljörðum króna á árinu 2023. Gert er ráð fyrir að hlutur ofanflóðasjóðs við gerð hættumats verði 140 milljónir kr.
Tekjur
Verðlagsuppfærsla krónutölugjalda mun auka tekjur ríkissjóðs um 5,3 milljarða kr. Hækkun útvarpsgjalds og gjalds í Framkvæmdasjóð aldraðra nemur samtals um 600 milljónum kr. Hækkanir á gjöldum sem falla undir lög um aukatekjur ríkissjóðs nema samtals um 500 milljónum kr. Áætlað er að breytingar á álagningu vörugjalda á ökutæki skili ríkissjóði 2,7 milljörðum kr. og að tvöföldun á lágmarki bifreiðagjalds 2,2 milljörðum kr. Gert er ráð fyrir að minni afsláttur af áfengi og tóbaki í tollfrjálsri verslun leiði til 700 milljóna kr. tekjuauka fyrir ríkissjóð. Áætlað er að breytingar á verðmætagjaldi vegna sjókvíaeldis skili ríkissjóði um 500 milljónum kr.
